तेश्रो पटक मन्त्री मण्डलको विस्तार

Written by Sitaram Baral

Wednesday, 17 June 2009 16:41

काठमाण्डौं- नयाँ सरकार बनेको करिव एक महिनापछि प्रधानमन्त्री माधब नेपालले तेश्रो पटक मन्त्री मण्डलको विस्तार गरेका छन् ।

तर तेश्रो पटकको विस्तारमापनि मन्त्री मण्डलले पूर्णता भने पाउन सकेन । बुधबार विस्तारित मन्त्री मण्डलमा परेका नेकपा एमाले र नेपाली कांग्रेसका मन्त्री र राज्यमन्त्रीहरुलेमात्र शपथ ग्रहण गरेका छन् भने कांग्रेसका विना विभागीय मन्त्रीहरुले मन्त्रालयको जिम्मेवारी पाएका छन् । मधेशवादी दलहरु भने सत्ता गठबन्धनका ठूला दल नेकपा एमाले र नेपाली कांग्रेसँग असन्तुष्ट देखिएका छन् ।

लामो कसरतपछि बुधबार विस्तारित मन्त्री मण्डलको सदस्यको रुपमा शपथ ग्रहण गर्नेमा सन्चार मन्त्री बनेका शंकर पोखरेल, गृहमन्त्री भीम रावल, शान्ति तथा पुनर्निर्माणमन्त्री रकम चेम्जोङ्ग, सामान्य प्रशासनमन्त्री रबीन्द्र श्रेष्ठ र मोहम्मद आफ्ताफ आलमले श्रम तथा यातायात मन्त्रीको रुपमा शपथ ग्रहण गरेका छन् । पोखरेल, रावल, चेम्जोङ्ग र श्रेष्ठ नेकपा (एमाले) को तर्फबाट मन्त्री भएका हुन् । आलमले भने नेपाली कांग्रेसको तर्फबाट मन्त्रीमण्डलमा प्रतिनिधित्व गरेका छन् । शपथ ग्रहण समारोहमा उपप्रधानमन्त्री विजय गच्छेदार भने उपस्थित भएनन् ।

करिव दुई हप्ता विना विभागीय मन्त्रीको रुपमा रहेका नेपाली कांग्रेसका डा.मीनेन्द्र रिजालले संघीय मामिला, संविधान सभा र संसदीय व्यवस्था मन्त्रालयको जिम्मेवारी पाएका छन् भने बालकृष्ण खाँणलाई जलश्रोत मन्त्रालय विभाजन गरी बनाइएको सिँचाई मन्त्रालय र जलश्रोतबाटै विभाजन गरिएको उर्जा मन्त्रालय डा. प्रकाशशरण महतलाई दिइएको छ । कांग्रेसकै उमाकान्त चौधरीले स्वास्थ्य मन्त्रालय पाएका छन् भने पूर्णकुमार शेर्माले स्थानीय विकास मन्त्रालयको जिम्मेवारी सम्हालेका छन् । मालेका डम्बर श्रेष्ठलाईपनि मन्त्रालय तोकिएको छ । उनले भूमिसुधार तथा व्यवस्था मन्त्रालयको जिम्मेवारी पाएका छन् ।

सोमबार विस्तारित मन्त्री मण्डलमा राज्यमन्त्रीको व्यवस्था गरिएको छ । जस अनुसार, नेपाली कांग्रेसका गणेशबहादुर खड्का स्थानीय विकास, चन्द्रिसंह भट्टराई उर्जा, खड्कबहादुर बस्याल स्वास्थ्य राज्यमन्त्री बनेका छन् । एमालेका जीतु गौतमलाई गृहराज्यमन्त्री बनाइएको छ । गौतम एमाले नेता केपी शर्मा ओलीका निकटस्थ मानिन्छन् । बुधबारको विस्तारपछि मन्त्री मण्डलका सदस्यको संख्या २० पुगेको छ । प्रधानमन्त्री नेपालले मन्त्री मण्डलको संख्या ४५ भन्दा बढि हुने बताइसकेका छन् । फोरमले मन्त्री, राज्यमन्त्री र सहायकमन्त्री गरी जम्मा १०, तमलोपाले मन्त्री ३ र राज्यमन्त्री ३ गरी ६, नेकपा (माले, सद्भावना पार्टीलेपनि मन्त्री र राज्यमन्त्री गरी २-२ जना माग गरेका छन् ।

राप्रपालगायत साना दलबाटपनि मन्त्री मण्डलमा सरिक हुने भएकाले मन्त्री मण्डलको संख्या ५० नाघ्ने अनुमान गरिएको छ । यसअघि संसदीय व्यवस्थाकालमा तत्कालिन प्रधानमन्त्री शेरबहादुर देउवाले ४८ सदस्यीय मन्त्रीमण्डल बनाएका थिए । सत्ता टिकाउन बढि मन्त्रालयको माग गरेका कारण देउवा र नेपाली कांग्रेसमात्र होइन, संसदीय व्यवस्था नै बदनाम बन्न पुगेको छ । फेरि सत्ता टिकाउनकालागि एमाले नेता नेपालले उस्तै आकारको मन्त्री मण्डल गठन गर्ने भएका छन् । जतिसुकै ठूलो मन्त्री मण्डल बनाएपनि सरकार लामो समय टिक्ने सम्भावना भने देखिएको छैन ।

-Sitaram Baral in Kathmandu

Comments

< Prev		Next >

NEWS: बिबिसी नेपाली सेवा ::

Inside

Comments

Most Popular News Links: Top 100

Member Login

Members Data

You Vote!