काठमाडौंमा नयाँ बन्ने सरकारबारे चलेका रमाइला टिप्पणी र जोकहरु

Written by Sitaram Baral

Thursday, 14 May 2009 04:38

काठमाण्डौं- सम्बिधान सभामा नराम्रो पराजय भोगेका दलहरु दुई दुई स्थानबाट चुनाव हारेका एमालेका बरिष्ठ नेता माधव नेपाललाई प्रधानमन्त्री बनाउन कस्सिएपछि राजधानी काठमाडौंमा रमाइला-रमाइला टिप्पणी र जोकहरु सुनिन थालिएका छन् ।

कतिपयले माधब नेपालले नेतृत्व गर्ने सरकारको मन्त्री मण्डलको रमाइलो खाका कोर्न थालेका छन् त कतिपयले प्रधानमन्त्री नेपाल बनेपनि नयाँ मन्त्री मण्डल बनिनसक्दै सरकार ढल्ने टिप्पणी गर्न थालेका छन् ।

यदि मन्त्री मण्डल बन्यो नै भने कस्तो बन्ला ? उनीहरुको अनुमान अनुसार प्रधामन्त्री माधब नेपाल हुनेछन् भने उपप्रधानमन्त्री तमलोपा अध्यक्ष महन्थ ठाकुर बन्नेछन् । गृहमन्त्री एमालेका इश्वर पोखरेललाई बनाइनेछ भने रक्षामन्त्री बन्नेछन् नेपाली कांग्रेसका महेश आचार्य । अर्थ मन्त्रालयको जिम्मेवारी एमालेका भरतमोहन अधिकारीले पाउनेछन् । आपूर्ति मन्त्रालयको जिम्मेवारी सद्भावना आनन्दीदेवीका श्यामसुन्दर गुप्ताले पाउनेछन् । शिक्षा मन्त्रालय भने कांग्रेसका गोबिन्दराज जोशीलाई मिल्नेछ । मन्त्री परिषद्को यो अनुमान मोटामोटी खाका मात्र हो तर यस्तै नबन्नसक्ने कुनै आधार छैन ।

नयाँ मन्त्रीहरुको उपरोक्त नाममा तपाईंले के समानता पाउनुभयो ? यो मन्त्रीमण्डलमा सबैजना प्रधानमन्त्रीसँग एकदमै फिट हुने अनुहार छन् । अर्थात्, सबै अनुहार गत सम्बिधान सभा चुनावमा पराजय भोगेका नाम हुन् । तमलोपाका ठाकुर सर्लाही- ६ बाट पराजित भएका थिए भने कांग्रेसका महेश आचार्य मोरङ्ग- ६ बाट पराजित भएका थिए । एमालेका पोखरेल काठमाडौं- ५ मा पराजित भएका थिए । यसैगरी एमालेकै अधिकारी मोरङ्ग- ४ बाट पराजय भोगेका थिए । सद्भावना आनन्दीदेबीका गुप्ता रुपन्देही- ६ मा पराजित भएका थिए । कांग्रेसकै जोशी तनहुँ- १ मा पराजित भएका थिए । यसमध्ये ठाकुर र गुप्ता पराजित भएपनि माधब नेपाललाई जसरी नै मनोनित गरी सम्बिधान सभामा ल्याइएको थियो ।

बुधबार राष्ट्रिय पत्रकारिता पुरस्कार ग्रहण गरिसकेपछि बरिष्ठ पत्रकार भैरव रिसालले बर्तमान नेपाली राजनीतिको बिडम्बनाबारे थोरै बोले । 'हामी अहिले कस्तो दृष्य देखिरहेका छौं भने दुई दुई स्थानबाट अत्याधिक मत ल्याएर जित्ने प्रचण्ड सत्ताबाट बाहिरिनु परेको छ भने दुई दुई स्थानबाट चुनाव हारेको व्यक्तिलाई प्रधानमन्त्रीको रुपमा अगाडि सारिएको छ' रिसालले भने -'जनताको अत्याधिक समर्थन पाएर जितेको व्यक्ति यसरी सत्ताबाट हट्न बाध्य हुन्छ र चुनाव हारेका व्यक्ति प्रधानमन्त्री बन्न तम्सिन्छन् भने यो भन्दा ठूलो बिडम्बना अरु के हुनसक्छ?

जव दुई दुई स्थानबाट चुनाव हारेको व्यक्ति प्रधानमन्त्री बन्दैछन् भने उनले गठन गर्ने मन्त्री मण्डल उपरोक्त पराजित अनुहारहरु हुनु कुन ठूलो कुरा भयो र ? अनि प्रधानमन्त्री र मन्त्री बन्न जनमतकै किन आवस्यकता पर्यो र जव उनीहरुको साथमा सेनापति र विदेशीहरु छन् भने ? निर्वाचित संस्था होइन सिर्फ सेनाको आडमा शासन गरेको छ भनेर लामो संघर्षपछि गतसाल जेठ १५ संविधान सभाको पहिलो बैठकले राजतन्त्र अन्त्यको घोषणा गरेको थियो । राजतन्त्र अन्त्य भएको एक बर्षपछि फेरि उस्तै दृष्य देिखंदैछ । अर्थात् सेनाको आडमा जनताबाट तिरस्कृत गरिएकाहरुद्धारा सरकार निर्माण ।'

तर विहीबार विहानसम्म एमाले नेता नेपालको नेतृत्वमा सरकार बन्ने न ग्यारेन्टी छ । नत त्यो सरकार टिक्छ भन्ने विश्वास नै आम नेपाली जनतालाई छ । सरकार बनिनसक्दै त्यो सरकार तीन महिनापनि टिक्न नसक्ने अनुमान धेरै नेपालीहरुले गर्न थालेका छन् । नयाँ सरकार बन्नासाथ सबैभन्दा पहिले सेना समायोजनको काम थाल्नुपर्ने हुन्छ किनभने सम्बिधान निर्माण कार्य सेना समायोजनसँगपनि जोडिएको छ । सेना समायोजन नभई नयाँ सम्बिधान बन्नै सक्दैन । अन्तरिम सरकारमा जस्तो नयाँ सम्बिधानमा पनि दुई वटा सेनाको प्रावधान राख्न मिल्दैन । जब सरकारले सेना समायोजको काम थाल्छ प्रधानसेनापति रुक्माङ्गद कटवालले अवरोध सिर्जना गर्न थालिहाल्छन् ।

सेना समायोजनमा सबैभन्दा बाधक हुने ठानेर प्रधानमन्त्री प्रचण्डले रुक्माङ्गद कटवाललाई हटाउन चाहेका थिए । तर राष्ट्रपति र दलहरु त्यसको विरुद्धमा लागे । जव माओवादीले नागरिक सर्वाेच्चताको कुरा उठाएर सरकारबाट राजिनामा दियो त्यसपछि कथित टेप प्रकरण अगाडि सारेर नागरिक सर्वाेच्चताको विषयलाई सेनाले विषयान्तर गर्न खोज्यो । यी सबै काम सेना समायॊजन हुन नदिने अभिप्रायले गरिएका थिए । माधब नेपाल प्रधानमन्त्री बनेमा कि उनी आफैले शान्ति सम्झौतामा गरेको हस्ताक्षर विपरित सेना समायोजनको विपक्षमा उभिनुपर्ने हुन्छ कि त उनले पनि सेनाको चुनौति सामना गर्नुपर्छ ।

जनताको त्यत्रो मत ल्याएर विजयी भएको माओवादी र प्रचण्डले त राजतन्त्रकालीन मानसिकता बोकेको सेनाबाट हैरान भएर राजिनामा दिनुपर्यो भने के जनताबाट निर्वाचितै नभएका माधब नेपालले नेतृत्व गरेको सरकारले सेनाको चुनौति सामना गर्न सक्ला ?

-Sitaram Baral in Kathmandu

Comments

< Prev		Next >

NEWS: बिबिसी नेपाली सेवा ::

Inside

Comments

Most Popular News Links: Top 100

Member Login

Members Data

You Vote!