काँग्रेस एमालेद्वारा बखेडा

Written by Sitaram Baral

Tuesday, 23 August 2011 15:15

काठमाडौ- माओवादी नेतृत्वमा सरकार बनाउने हो भने शान्ति प्रकृया र सेना समायोजनकालागि एमाओवादी थप लचकदार बन्नु पर्ने र शान्ति प्रकृयाकाबारे ठोश कदम चाल्नु पर्ने माग गर्दै आएका नेपाली कांग्रेस र नेकपा एमालेले अनौपचारिकरुपले सहमति भैसकेका विषयहरुलाई उल्ट्याउने गरी नयाँ प्रस्ताव अघि सारेपछि बन्नै लागेको सहमतिको वातावरण बिग्रेको छ ।

मधेशवादी दलहरुको समर्थनमा माओवादी नेतृत्वमा बहुमतीय सरकार बन्ने सम्भावना देखिएपछि नयाँ सरकारलाई अप्ठेरोमा पार्न नेपाली कांग्रेस र एमालेको माधब नेपाल केपी ओली पक्षले अनौपचारिक रुपले भैसकेका सहमति विपरितका प्रस्ताव अघि सारेका हुन् ।

नेपाली सेना अन्तर्गतको महानिर्देशनालय अन्तर्गत माओवादी लडाकूहरुलाई समायोजन गर्ने समायोजित हुने लडाकूको संख्या ६ देखि ८ हजार हुने पुनरस्थापनामा जाने माओवादी लडाकूहरुलाई तह हेरी ५ देखि ८ लाखसम्म दिने लगायतका बिषयमा दलहरुबीच अनौपचारिक सहमति भैसकेको थियो । राजिनामा दिने बेला प्रधानमन्त्री झलनाथ खनालले पनि उपरोक्त बिषयहरुमा सहमति भैसकेको र तिनीहरुलाई सूत्रबद्ध गरेर लेख्ने काममात्र नभएको बताउँदै भैसकेका यी सहमतिमा टेकेर शान्ति प्रकृयालाई अघि बढाउन सकिने बताएका थिए । तर नेपाली कांग्रेस र एमालेको नेपाल ओली पक्षले भैसकेका यी सहमतिमा भाँजो हाल्न खोजेपछि शान्ति प्रकृयाको सम्बन्धमा फेरि आशंका बढेको छ ।

श्रोतकाअनुसार नेपाली कांग्रेस र एमालेको सो पक्षले माओवादी लडाकूलाई ४ देखि ५ हजारको संख्यामा मात्र समायोजन गर्न सकिने समायोजनको साटो पुनरस्थापनामा जाने लडाकूमध्ये सिपाही तहलाई २ लाख कमाण्डर तहलाई तीन लाखसम्ममात्र दिन सकिने प्रस्ताव तैयार पारेका छन् । आफूहरुले तैयार पारेको यो प्रस्तावमा एकिकृत माओवादी सहमत भएमात्र उसलाई सरकारको नेतृत्व गर्न दिने सहमति नेका र एमालेको सो पक्षले गरेको छ । साथै एमाओवादीले मधेशी मोर्चाको सहयोगमा बहुमत प्राप्त गरी सरकार बनाएमा पनि पूर्व सहमति विपरित तैयार पारिएको यो प्रस्तावमा दायाँ बायाँ हुने गरी काम गर्न नदिने योजना उनीहरुले बनाएका छन् ।

-Sitaram Baral in Kathmandu

Read our exclusive reporting on: