प्रधानमन्त्री पदको निर्वाचनको पहिलो दिन नै नयाँ प्रधानमन्त्री निर्बाचित हुने सम्भावना

प्रधानमन्त्री पदको निर्वाचनको पहिलो दिन नै नयाँ प्रधानमन्त्री निर्बाचित हुने सम्भावना

Written by Sitaram Baral

Friday, 26 August 2011 14:08

काठमाडौं- तोकिएको समयावधिभित्र प्रधानमन्त्री पदकालागि दुई जना उम्मेदवारले मात्र उम्मेदवारी दर्ता गरेपछि प्रधानमन्त्री पदको निर्वाचनको पहिलो दिन नै मुलुकले नयाँ प्रधानमन्त्री पाउने सम्भावना देखिएको छ ।

प्रधानमन्त्रीकालागि सम्बिधान सभाको सबैभन्दा ठूलो दल एकिकृत नेकपा (माओवादी) बाट डा. बाबुराम भट्टराई र दोश्रो ठूलो दल नेपाली कांग्रेसबाट रामचन्द्र पौडेलले उम्मेदवारी दर्ता गराएका छन् । प्रधानमन्त्री पदको पहिलो निर्वाचन भदौ ११ गते आइतबारका दिन हुँदैछ ।

डा. भट्टराईलाई प्रधानमन्त्रीको उम्मेदवार बनाउन उम्मेदवारी पत्रमा अध्यक्ष पुष्पकमल दाहाल (प्रचण्ड) ले प्रस्ताव गरेका छन् भने समर्थकमा एमाओवादी संसदीय दलका उपनेता नारायणकाजी श्रेष्ठ (प्रकाश) छन् । उम्मेदवारीको सूचना दर्ता गराउन डा. भट्टराई, अध्यक्ष प्रचण्ड, उपाध्यक्ष नारायणकाजी श्रेष्ठ सचिव पोष्टबहादुर बोगटी र प्रवक्ता दिनानाथ शर्मा र पत्नी हिसिला यमीसहित संसद सचिवालय पुगेका थिए । ११ बजेर १५ मिनेट जाँदा उनको मनोनयन दर्ता भएको थियो ।

भट्टराईको उम्मेदवारी दर्ता भएको केही समयपछि कांग्रेस संसदीय दलका नेता रामचन्द्र पौडेलले उम्मेदवारी दर्ता गराएका थिए । पौडेलको समर्थकमा महामन्त्री एवम् संसदीय दलका उपनेता प्रकाशमान सिँह र समर्थकमा विमलेन्द्र निधि छन् । उम्मेदवारीकालागि उनलाई चुनौति दिएका बरिष्ठ नेता शेरबहादुर देउवा प्रस्तावक बसेर पौडेलको उम्मेदवारी दर्ता गराइने विश्वास गरिएपनि देउवा प्रस्तावक नबसेपछि पौडेलको उम्मेदवारीप्रति देउवा अझै असन्तुष्ट रहेको अनुमान गरिएको छ ।

यस अगाडि जस्तो प्रम चुनावमा तटस्थ बस्न नपाइने र प्रमका लागि दुई जनामात्र उम्मेदवार भएकाले एकै पटकको निर्वाचनबाट प्रधानमन्त्री चुनिने सम्भावना देखिएको छ । अहिलेसम्मको स्थितिमा डा. भट्टराई बलिया उम्मेदवार देखिएका छन् । माओवादीप्रति सकरात्मक मधेशी मोर्चाको मत पाएमा उनी सहजै विजयी हुनेछन् । पौडेलका लागि चाहिँ मोर्चा र एमाले दुवैको मत आवस्यक छ । एमालेले कसलाई दिने भन्ने टुङ्गो गरिसकेको छैन । संघीयताप्रति अनुदार पौडेलप्रति मोर्चा निकै नकरात्मक देखिन्छ ।

दुवै उम्मेदवारले शान्ति प्रकृया र सम्बिधान लेखनकालागि आफ्नो उम्मेदवारी रहेको बताए । मनोनयन दर्ता गराएपछि सन्चारकर्मीहरुसँग कुरा गर्दै डा. भट्टराईले आफू प्रममा निर्वाचित भए शान्ति प्रक्रिया र संविधान निर्माण निष्कर्षमा पुग्ने बताए । साथमा रहेका एमाओवादी अध्यक्ष प्रचण्डले यस पटक शान्ति प्रकृयाकालागि एमाओवादी बोल्ड बनेर आएकाले आफ्ना उम्मेदवार विजयी हुने विश्वास गरे ।

पौडेलले पनि आफू प्रधानमन्त्रीमा निर्वाचित हुने पक्का भएको बताउँदै आफू प्रममा निर्वाचित भएमा मात्र शान्ति प्रकृया र सम्बिधान लेखन कार्य सहजताका साथ अघि बढ्ने दावी गरे । पौडेल यसअघि भएका प्रधानमन्त्री निर्वाचनमा चाहिँ १७ पटक पराजित भएका थिए । एमालेको माधब नेपाल केपी ओली पक्ष उनलाई मत दिने पक्षमा भएपनि संस्थापन पक्ष भने उनीप्रति अझै उदार बन्न सकेको छैन । एमालेको मत नपाउने हो भन्ने अन्य दलकोमात्र मतले उनी विजयी हुने सम्भावना छैन ।

-Sitaram Baral in Kathmandu

Read our exclusive reporting on: