नेपालकी प्रथम महिला उपप्रधानमन्त्री शैलजा आचार्य अब रहिनन्

Written by USNepalOnline.com

Thursday, 11 June 2009 23:14

काठमाडौं, न्यू योर्क - सालिन ब्यक्तित्वकि धनी नेपालकि पूर्व उपप्रधानमन्त्री एबं नेपाली काङ्ग्रेसकि नेत्री शैलजा आचार्यको स्रुक्रबार बिहान शिक्षण अस्पातल महाराजगन्जमा उपचार गर्दा गर्दै असामयिक निधन भएको छ। पूर्व प्रधानमन्त्रीहरु बिपी कोइराला र गिरिजाप्रशाद कोइरालाकि भान्जी आचार्य अविवाहित हुनुहुन्थ्यो।उहाँ ६७ बर्षको हुनुहुन्थ्यो ।

भ्रस्टाचारको कट्टर बिरोधी आचार्य भ्रस्ट नेपाली नेताहरुका बिच एक निस्कलङ्क ब्यक्तित्व हुनुहुन्थ्यो। उनको असामयिक निधनबाट देशले एक कर्मठ नेपाली छोरीलाई गुमाएको छ।

बिगत दुई बर्षदेखी अल्जेमेर रोगबाट पीडित आचार्य ९ महिनाभन्दाबेशी छिमेकी मुलुक थाइल्यान्डको राजधानी बैंककस्थित अस्पतालका शैय्यामा मृत्‍युसँग लड्दै आउँदैहुनुहुन्थ्यो।

नेपालको पहिलो महिला उपप्रधानमन्त्री आचार्यलाई डेढ बर्षअघि तत्कालिन अन्तरिम सरकारले भारतकालागि राजदूतको रुपमा प्रस्ताव गरेको थियो । भारत सरकारबाट एग्रिमो आएपनि उहाँ अचानक अस्वस्थ भएपछि उहाँको सट्टा नयाँ राजदूतको रुपमा दुर्गेशमान िसंहलाई चयन गरिएको थियो ।

स्वास्थस्थिति नाजुक बन्दै गएपछि लामो समय बैङ्ककमा उपचार गराइनु भएकी आचार्यलाई तीन महिनाअघि काठमाडौं फिर्ता ल्याइएको थियो । स्वास्थ्यमा सुधार आएपनि उहाँ बोल्न भने सक्नुहुन्थेन । उहाँका परिवारजनहरुले लेखर उहाँसँग कुराकानी गर्ने गरेका थिए ।

२०१७ सालमा सैनिक बलका आधारमा राजा महेन्द्रले पन्चायती व्यवस्था लादेपछि किशोर उमेरकी आचार्य नेपाली कांग्रेसको झण्डा बोकेर प्रतिरोधमा उत्रनु भएको थियो । त्यसैबेलादेखि राजनीतिमा होमिनु भएकी आचार्य बीपी कोइरालाको नेतृत्वमा भएको सशस्त्र संघर्षमासमेत सामेल हुनुभयो ।

नेपाली कांग्रेसभित्र निर्भिक नेतृको रुपमा चिनिनु भएकी आचार्यले भ्रष्टाचार विरुद्ध पार्टीभित्रैबाट आवाजसमेत उठाउनु भएको थियो । कृषिमन्त्री पदबाट राजिनामा दिएर भ्रष्टाचार विरोधी आन्दोलनमा सकृय भएकी आचार्यलाई पार्टीभित्रैबाट पाखा लगाउने प्रयत्न भएका थिए । पछिल्लो समयमा राजा निकट देखिएपछि उहाँ बढि आलोचित हुन थाल्नु भएको थियो ।

नेपाली कांग्रेसकि पूर्व उपसभापति तथा मृत्‍यु पर्यन्त केन्द्रिय सदस्य आचार्यको सम्मानमा नेका केन्द्रिय कार्यालय, सानेपामा आज बिहान ९ बजेपछि सार्वजनिक श्रद्धन्जलीको लागि उहाको शबलाई राखिने छ।

स्व. आचार्यको आत्माले चीर शान्ती पाओस् अनि उनका शोक शन्तप्त परिवारलाई यो दु:खद घडीमा धैर्य धारण गर्ने मनोबल मिलोस्-हाम्रो हार्दिक समबेदना।

Late Shailaja Acharya. Photo courtesy: nepalicongress.org

-USNepalOnline.com

US Nepal Media Center

New York / Kathmandu